Bakı İstintaq Təcridxanasında saxlanan Müsavat başqanının müşaviri Yadigar Sadıqov “Media forum” saytının suallarını cavablandırıb.
Yadigar Sadıqov 1968-ci ildə Lənkəran şəhərində anadan olub. 1994-cü ildə Bakı Dövlət Universitetinin tarix fakültəsini bitirib. 2000-ci ildən Müsavat Partiyasının üzvüdür.Yadigar Sadıqovu iyunun 27-də Lənkəran şəhər sakini Rəşid Kərimovun şikayəti əsasında yerli polis şöbəsi saxlayıb. O, xuliqanlıqda ittiham olunur. İyunun 29-da Lənkəran Rayon Məhkəməsi Yadigar Sadıqov barəsində 2 aylıq həbs qətimkan tədbiri seçib.
- Saxlanma şəraitindən şikayətiniz varmı, istintaq təcridxanası əməkdaşlarının sizə münasibəti necədir?

- Saxlanma şəraitində nöqsanlar və qanunsuzluqlar yox deyil. Necə olsa, rejimin təcridxanasıdır. Əməkdaşların münasibəti isə əsasən normal, hörmətcildir.

- Kamerada sizdən başqa kimlər var? Vaxtınızı necə keçirirsiniz? Bir gününüzü qısaca təsvir edə bilərsinizmi?

- Kameramız 6 nəfər üçün nəzərdə tutulsa da, 8 çarpayı qoyulub. Hazırda 8 nəfərik. Ölkəmizin müxtəlif bölgələrindəndirlər. Nədə ittiham olunduqlarını söyləmək istəmirəm.

Burada dustaqların, demək olar, hamısı gününü əsasən iki şeylə keçirir: televiziyaya baxmaqla və stolüstü oyunlar (domino, nərd, dama) oynamaqla. Bunlardan əlavə, dustaqların bir qismi idman və mütaliə ilə vaxtını öldürür.

Günümün sabit qrafiki əsasən səhər olur. Yerimdən qalxan kimi səhər yeməyi yeyirəm. Saat 9-da gəzinti yerinin qapısı açıldıqdan sonra gəzintiyə başlayıram. Minimum 2 min addım gəzirəm (Saat 5-də gəzinti yerinin qapısı bağlanana qədər daha 2 min addım gəzirəm ən azı). Sonra səhər gimnastikası ilə məşğul oluram. Qalan vaxt ərzində mən də stolüstü oyunlar oynayıram, televizora baxıram, mütaliə edirəm. Hərçənd özündən başqa 7 nəfərin olduğu kamerada mütaliə etmək bir qədər problematikdir. Hazırda Stefan Sveyqin “Jozef Fuşe” əsərini oxuyuram.

Axşam saat 11-də televizor söndürülür. Bundan sonra növbə ilə yuyunub yatırıq.

Yeri gəlmişkən, suyun böyük fasilələrlə verilməsi təcridxananın ciddi nöqsanlarından biridir. Müxtəlif qablara su toplamağımız da buradakı həyatımızın önəmli hissəsidir.

- Necə düşünürsünüz, sizi nəyə görə həbs ediblər?

- Həbsimin əsas səbəbkarları Lənkəranın icra başçısı Taleh Qaraşov və polis rəisi Möhübbət Hüseynovdur. Mən onların fəaliyyətini, qanunsuzluqlarını mütəmadi tənqid edirdim. Mətbuata verdiyim müsahibələrimlə, məqalələrimlə və internetdə yazdığım fikirlərlə ictimailəşdirirdim. Həbsimdə digər hədəf də seçki ilində Lənkəran kimi böyük rayonda müxalifətin fəaliyyətini iflic etməkdir.

Digər tərəfdən məlumdur ki, hakimiyyət sosial şəbəkələrdə agentura vasitəsilə “Parçala, hökm sür” siyasətini həyata keçirməyə çalışır. Mən buna qarşı cəmiyyətimizin müxtəlif təbəqələri arasında qarşılıqlı etimadın bərqərar olunması istiqamətində ciddi iş aparırdım. Görünür, bu da nəzərdən qaçmayıb.

- İstintaqın gedişindən razısınızmı? Sizin iş üzrə hazırda hansı istintaq hərəkətləri həyata keçirilir?

- Heç bir istintaq hərəkəti aparılmır. Axı nəyi istintaq edəcəklər? Təxribatın əsas təşkilatçısı, ssenaristi hakimiyyət adamlarıdır. Belə olan halda söhbət istintaqdan deyil, düzüb-qoşmaqdan gedə bilər. Onların nə düzüb-qoşacağı isə mənə də, başqalarına da məlumdur.

- Vəkiliniz və yaxınlarınızla əlaqə saxlaya bilirsinizmi?

- Bəli, bu sahədə hüquqlarım təmin olunur. Vəkilim nə zaman gəlirsə, o zaman görüşürük. Həftədə bir dəfə görüş, bir dəfə də sovqat alıram. Eləcə də həftədə iki dəfə hər biri 15 dəqiqə olmaqla telefonla danışıram.

- Əqidə yoldaşlarınız həbsinizi lazımi qədər diqqətdə saxlayırmı?

- Həbsimə reaksiya, göstərilən diqqət uma biləcəyimdən artıqdır. Müsavat Partiyası, hüquqlarımı müdafiə edən komitə problemə hüquqi və siyasi reaksiya istiqamətində hər bir şey edir. Qeyri-hüquqi sahədə də istər özümə, istərsə də ailəmə qayğı və diqqət ən yüksək səviyyədədir. Müsavatçılarla yanaşı məni sosial şəbəkələrdən tanıyanlar, bitərəf şəxslər, Lənkəran ictimaiyyətinin nümayəndələri bu işdə iştirak edirlər. Hər birinə sonsuz minnətdarlığımı bildirirəm.

- Milli Şuranın fəaliyyəti barədə nə düşünürsüz? Sizcə, görülən işlər bu günün tələblərinə cavab verirmi?

- Buradan Milli Şuranın fəaliyyətini tam izləmək çətindir. Amma izləyə bildiklərim ürəkaçan deyil. Məncə, daha məhsuldar işləmək olardı.

- Milli Şuranın ehtiyat namizədi olması ideyasına münasibətiniz necədir?

- Milli Şura seçkidə sırf Rüstəm İbrahimbəyovun namizədliyi ilə iştirak etmək üçün yaradılmayıb. Qurum seçkidə müxalifətin birgə iştirakı üçün yaradılıb və sonra Rüstəm bəy ən uğurlu namizəd sayılıb. Əgər hansısa şərtlər onun qeydiyyatı ilə bağlı problem yaradırsa və dolayısı ilə Rüstəm bəy ən uğurlu namizəd olmursa, o zaman digər namizəd olmalıdır.

- Hakimiyyət Rüstəm İbrahimbəyovun namizədliyini qeydə almayacağı təqdirdə müxalifətin boykot taktikası seçməsini təklif edənlər var. Siz bu barədə nə düşünürsüz?

- Boykotu rədd edirəm. Mən 2008-ci ilin prezident seçkisi ilə bağlı Müsavat Məclisində müzakirələr zamanı da boykotun əleyhinə səs vermişəm. Saysız arqumentlər gətirə bilərəm, amma münasib şəraitdə deyiləm. Sadəcə, seçkidə müxalifətin bir hissəsinin iştirakının guya hakimiyyətin istəyi olduğu, seçkinin legitimləşdirilməsinə xidmət etdiyi barədə fikirlərə cavab vermək istəyirəm. Hakimiyyətin də, beynəlxalq aləmin də legitimlik veclərinə deyil, özümüzü aldatmayaq. Əgər müqavimət yoxdursa, rejim vəziyyətə tam nəzarət edirsə, beynəlxalq aləm tərəfindən də qəbul olunacaq. Mən tarixçiyəm, amma hələ müxalifətin boykotu, beynəlxalq aləmin də başını bulayıb “nırç-nırç” eləməsi ilə devrilən diktatura xatırlamıram. Bu gün İlham Əliyevin bütləşdirilməsi prosesi gedir. Seçki kampaniyasından imtina da bunun göstəricisidir. İlahi qüvvə qara camaatdan “mənə səs verin” deyə xahiş etməyi özünə sığışdırmır. Bu bütləşdirmə prosesi üçün müxalifətin boykotu, heç bir tənqidi fikrin səslənməməsi ideal variantdır. Bu baxımdan seçkidə iştirak mübahisə doğurmamalıdır.

- Sizcə, Müsavat başqanı İsa Qəmbərin prezidentliyə namizədliyinin qüvvədə qalması doğru taktikadırmı?

- Tamamilə doğru taktikadır. Əgər Milli Şura iştirak etməyəcəksə, Müsavat Partiyası tək və ya digər qüvvələrlə birlikdə seçkidə iştirak etməli, xalqla təmasa çalışmalıdır. Bəli, qalib gəlmək çox çətin olacaq. Amma qələbə bu gün mümkün deyilsə, sabah olması üçün fəaliyyət göstərmək lazımdır. Yoxsa konduktorun acığına tramvaydan düşüb piyada getmək doğru taktika deyil.

- Avropa Parlamentinin və ATƏT-in Parlament Assambleyasının Azərbaycandakı prezident seçkisinə müşahidəçi göndərməmək qərarını necə qiymətləndirirsiz? Sizcə, bu, Azərbaycanda azad seçki keçirmək imkanlarını məhdudlaşdıracaqmı?

- Bu Avropa strukturlarının növbəti biabırçı addımıdır və bunun fonunda boykot təklif edərək beynəlxalq reaksiyaya ümid etmək təklifi xüsusilə anlaşılmaz görünür. Sualınızın ikinci hissəsinə gəldikdə, məgər müşahidəçi missiyalarının göndərilməsi əvvəllər seçki saxtakarlığına mane olubmu? Saxtakarlığa qarşı mübarizəni, rejimə qarşı müqaviməti Azərbaycan xalqı göstərməlidir. Bunun üçün də ona xitab etmək, onunla işləmək lazımdır. Ciddi müqavimət olacağı təqdirdə beynəlxalq aləm də xalq iradəsinin yanında olacaq.