Sahibkarların sözlərinə görə, polis əllərində icazə sənədi olmalarına baxmayaraq, satışın qabağını alıb

Həyat tərzi Bakıda mətbuat yayımı ilə məşğul olan bir qrup kiçik sahibkarların obyetkləri dağıdılıb. Bu barədə sahibkarların özləri ANS PRESS-ə şikayət ediblər. Onların sözlərinə görə, Səbail rayonu ərazisində Bakı şəhər İcra Hakimiyyətinin xüsusi icazəsi əsasında şəhərin mərkəzində qazet və jurnalların satışı ilə məşğul olurlar. Lakin Səbail rayon Polis İdarəsi əməkdaşları onların işinə mane olaraq, obyektlərini dağıdıblar.

Sahibkar İbad Manafov ANS PRESS-ə açıqlamasında bildirib ki, polis əllərində icazə sənədi olmalarına baxmayaraq, satışın qabağını alıb.

Sahibkar İbad Manafov isə problemlə bağlı aidiyyatlı orqanlara müraciət etdiklərini bildirdi. “Qəzet və jurnal satış məntəqələri bağlayıblar. Biz bununla əlaqədar bir çox dövlət müəssisələrinə, hüquq-mühafizə orqanlarına və Mətbuat Şurasına müraciət etdik. Lakin problemlə bağlı müraciət etdiyimiz salahiyyətli kəslər bizə heç bir yardım etmədi. İcra Hakimiyyətindən bildiriblər ki, biz icazə vermişik. Əlimizdə icazə kağızı da var. Amam polis buna əhəmiyyət vermir” söyləyən İbad Manafov bildirib.

Əfqanıstan veteranı Arif Əsgərov da ANS PRESS-ə açqılamasında Səbail rayon polis idarəsinin işçiləri şəhərin mərkəzi küçələrindəki dörd qəzet satışı nöqtəsini bağlamasından şikayətlənib. Onun sözlərinə görə, yeganə qazanc yeri bağlanarsa, onun və ailəsinin maddi durumu pisləşəcək.

“Biz icazə almışıq. Hər ay vergi də ödəyirk. Yeganə qazanc yerim burdandır. Bura da bağlansa, ailəm çörəkpulusuz qalacaq. Qalmışam naəlac”, - deyə Arif Əsgərov şikayətlənib.

Məsələ ilə əlaqədar Bakı şəhər İcra Hakimiyyətinin Ticarət və Xidmət Departamentinin rəhbəri Əliabbas Bağırov ANS PRESS-ə açıqlamasında onlara da bu barədə şikayət daxil olduğunu bildirib. “Biz onlara icazə vermişik. Onların əksəriyyəti veteran, şəhid ailəsidir. Biz polislə də əlaqə saxlamışıq. Çalışırıq ki, problem həll olunsun. Bu işi diqqətdə saxlamışıq”, - deyə Əliabbas Bağırov vurğulayıb.

Polisin qəzet və jurnal satışının qarşısının alma səbəblərini öyrənmək üçün Səbail rayon Polis İdarəsilə əlaqə saxladıq. İdarədən ANS PRESS-ə bildirdilər ki, qəzet və jurnallar küçədə kustar üsulu ilə düzəldilən vitrinlərdə satılır. Bu da qanunsuz küçə ticarətidir. Polis də şəhərin təmizliyini qorumağa çalışır. Məsələ Daxili İşlər Nazirliyində araşdırılacaq. Daxili İşlər Nazirliyinin mətbuat xidmətindən ANS PRESS-ə bildirilib ki, məsələ araşdırılacaq.