Səhiyyə sektorunun həlli vacib olan xeyli problemləri var.

Müsahibimiz “Səhiyyə Hüquqları İnstitutu” İctimai Birliyinin sədri Elçin Novruzovdur.

-Elçin müəllim, “Səhiyyə Hüquqları İnstitutu” İctimai Birliyinin yaranması hansı zərurətdən meydana gəlib?

– İlk öncə qeyd edim ki, mən özüm tibb işçisiyəm və Azərbaycanın səhiyyə sistemi haqqında kifayət məlumatım var. İkinci tərəfdən yaradılan bu təşkilat konstitusiyayla müəyyən olunmuş hüquqdur ki, biz də bundan istifadə edib ictimai birlik təsis edirik. Sadəcə mən öz peşə yönümə uyğun olaraq ictimai təşəbbüs göstərmək istəyirəm. Buna görə də səhiyyə sistemində çatışmazlıqların aradan qalxmasına, bu sferada ictimai təşəbbüslərin güclənməsinə, tibb işçilərinin sosial-iqtisdi vəziyyətinin yaxşılaşması üçün islahatların aparılmasına dəstək vermək istəyirik. Digər tərəfdən qeyd edim ki, təşkilatımızın yaranması ideyası artıq 3 ilə yaxındır ki var və hesab etmək olar ki, təşkilat iki ildir artıq mövcuddur. Sadəcə bu günlərdə biz peşəkar şəkildə bütün sənədlərimizi hazırlayıb Ədliyyə Nazirliyinin Qeydiyyat və Notariat Baş İdarəsinə təqdim etdik. Bu da qanunun başqa tələbidir ki, bunu da etməliyik. Həm də biz aktiv şəkildə Səhiyyə hüquqlarıyla məşğul olan Qeyri-Hökumət Təşkilatı kimi fəaliyyət göstərmək istəyirik.

- Elçin müəllim, o zaman peşəkar səhiyyə işçisi kimi deyə bilərsinizmi, Azərbaycanda səhiyyə sistemində hansı həlli vacib olan problemlər var?

– Bu sual o qədər genişdir ki, hardan başlayıb, harda qurtarmaq lazım olduğunu müəyyənləşdirmək çox çətindir. Bir neçə istiqamət üzrə problemləri sadalaya bilərəm ki, o istiqamətdə çoxlu sayda həlli vacib olan problemlər var. Tibbi sığorta məsələsi illərdir öz həllini tapmır. Tibb işçilərinin əmək haqqı bu gün olduqca bərbad vəziyyətdədir. Tibb sahəsində lisenziya verilməsində olan obyektiv və subyektiv amillər də əczaçıların, stomatoloqların daha çox rastlaşdıqları problemlərdir. Ölkənin bütün hüdudlarında peşəkar olmayan insanlar stomatoloji kabinetlər açaraq diş həkimlərinin işlərini görürlər. Mən indi çox primitiv şəkildə yadımda qalan problemləri sadaladım. Digər bir məsələ tibb personalının həmkarlar ittifaqı məsələsidir. Çünki, həmkarlar daha çox rəhbərliyi müdafiə edirlər nəinki, işçiləri. Mən hələ pasiyentlərin hüquqlarıyla bağlı məsələlərdən, xəstəliklərin qarşısını almaq üçün profilaktik tədbirlərin görülməsində olan çətinliklərdən danışmıram. Hesab edirəm ki, görəcəyimiz işlərlə bağlı gələcəkdə ictimaiyyətə ətraflı məlumat veriləcəkdir.

Rahib Bəxtiyarov
"Gündəm Xəbər"