“Gündəm Xəbər” qəzetinin 20-26 noyabr 2017-ci il tarixli sayının 6-cı səhifəsində “Bayram Səfərovun icra nümayəndəsi, ona on il dərs keçən müəlliminə “əl qaldırıb”-ŞOK OLAY başlıqlı açıqlama dərc olunmuşdu. Açıqlamanın dərcinə səbəb, əslən Şuşadan olan və Qəbələ rayonunun “Qaçqın şəhərciyi” qəsəbəsində yaşayan Quliyev Həsən Hüseyn oğlu adlı şəxsin redaksiyamıza ünvanladığı müraciət olmuşdur.

Onu da bildirək ki, ötən həftə qəzetimiz çapa hazırlanarkən qarşı tərəf olaraq nə adı çəkilən qəsəbə üzrə icra nümayəndəsi vəzifəsini daşıyan Həsənov Əhəd Əmir oğlundan, nə də ki, Şuşa RİH-dən səslənən ittihamlarla bağlı hər hansı mövqe öyrənə bilmədiyimizdən, açıqlama bitərəfli qaydada dərc olunmuşdu. Digər tərəfdən, Qəbələ rayonu redaksiyanın fəaliyyət göstərdiyi Bakı şəhərindən olduqca uzaq məsafədə yerləşdiyi üçün, ünvanlanan müraciətdə səslənən ittihamları, sadalanan faktları dərhal araşdırmaq imkanımız xaricində idi. Amma, yaxın vaxtlarda 76 yaş həddinə çatmış Həsən Quliyev adlı şəxsin səsləndirdiyi ittihamları, sadaladığı faktları araşdırmaq məqsədilə Qəbələ rayonunun “Qaçqın şəhərciyi” qəsəbəsində yaşayan sakinlərlə görüşməyi, əksər mətləblərə aydınlıq gətirməyi və s. qarşımıza məqsəd qoymuşuq.
Bütün bunlara baxmayaraq, bir-iki gün bundan öncə həmin açıqlamada dərc olunanlarla bağlı “Qaçqın şəhərciyi” qəsəbəsi üzrə icra nümayəndəsi vəzifəsini daşıyan Əhəd Həsənovun oğlu olduğunu bildirən Məhəbbət Həsənov adlı şəxs, qarşı tərəf olaraq öz mövqelərini redaksiyamızın elektron poçtuna göndərmiş və onu dərc etməyimizi də xahiş etmişdi. Odur ki, qarşı tərəfin də mövqeyini dərc etməyi özümüz üçün borc bildik.

Qarşı tərəf:
“Hörmətli Gündəm xəbər qəzetinin rəhbəri və yazarları.
Mən Həsənov Məhəbbət Əhəd oğlu bir zərərcəkmis kimi, bir övlad kimi sizə yaziram. Atam Həsənov Əhəd Əmir oğlu haqqında qəzetinizin 20-26 noyabr 2017 ci il tarixli, 59 - nömrəli sayında yayımlanan xəbər bir övlad olaraq məni cox sarsıtdı. Digər tərəfdən Qəzetiniz araşdırmadan hər hansı bir şəxsin istəyi ilə bü cür yazı yazmağı məni məyus etdi. Yazı azadlığı bu deyil. Yazı azadlığı dəqiq və qərəzsiz yazmaqdır. Atam haqqında yazılanlar şər və böhtandır. Bildirmək istəyirəm ki, mən Həsənov Məhəbbət Əhəd oğlu Turizm kollecinin məzunu, eyni zamanda Türkiyə Atatürk Universitetində təhsil almış gəncəm. Hər zaman çalışmışam ki, Dövlətimizə, Elimizə layiqli bir övlad olam. Atam Həsənov Əhəd Əmir oğlu Şuşa rayonunun Səfixanlar kənd ərazi nümayəndəsidir. Hal-hazırda Şuşa rayonunun Qəbələ rayonu üzrə səlahiyyətli nümayəndəsidir. 1981-ci ildə indiki Gəncə Dövlət Universitetini fərqlənmə diplomu ilə bitirmişdir. Ali təhsilli olaraq uzun müddət müəllim işləmiş və baş müəllim adını qazanmışdır. Ümumilikdə 44 il iş stajı olan II- ci dərəcəli Dövlət qulluqçusudur. İşində hər zaman dəqiq, diqqətli və ləyaqətli olub.
Qeyd edim ki, ləyaqət insanın ali keyfiyyətidir. Və ləyaqət insanın təkcə davranışına, münasibətinə deyil, onun fəaliyyətinin bütün istiqamətlərinə şamil edilən epitetdir. Kimin harada, hansı sahədə fəaliyyət göstərməsindən asılı olaraq, insanın bu sahədəki işi də ləyaqət tələb edir. Həkim ləyaqəti, müəllim ləyaqəti, alim, jurnalist, sənətkar, usta… ləyaqəti. Bütün bunların məcmusunda da, atam işində və əməlində ləyaqətli olmuşdur. Bir Dövlət qulluqçusu kimi hər zaman Dövlət tədbirlərində, eyni zamanda elimizin xeyir və yas mərasimlərində hər zaman iştirak etmişdir. Xalqının yanında olmuşdur. Şuşa rayon icra hakimi cənab Bayram Səfərovun bütün tapşırıq və göstərişini hər zaman dogru və dürüst yerinə yetirmişdir. Xidməti vəzifəsindən hec vaxt sui-istifadə etməyib. Dövlətimizin məcburi köçkünlərə qayğısının nümünəsi olaraq bizlər Qəbələ rayonunda evlə təmin olunmuşuq. Yaşadığımız Zarağan – 2 Məcburi köçkünlərin yaşayış kompleksinin açılışında hörmətli prezidentimiz İlham Əliyev cənablarının önündə də çıxış etmişdir. Bununla Xalqına, Millətinə necə ləyaqətli bir insan, bir ata olduğunu sübüt etmişdir. Yaşadığımız Qəbələ rayonunun camaatından, eyni zamanda məskunlaşdığımız Zarağan-2 məcburi köçkünlərin yaşayış kompleksinin sakinlərindən Əhəd müəllimin necə bir insan olduğunu sorusa bilərsiniz.
Bildirirəm ki, Həsən Quliyev tərəfindən yazılanlar hamısı şər və böhtandır. Əgər bu barədə sübutu varsa bəyan eləsin. Həqiqətə uyğun deyil. Atam Əhəd Həsənovun adına qara ləkə yaxmaqdır. Eyni zamanda orada vurğulanan rüşvət məsələləri özü bir cinayətdir. Həsən Quliyev qeyd edir ki, güya Əhəd Həsənov tərəfindən cənab Bayram Səfərova qarşı tənqidi fikirlər söyləyib. Bu ağ yalandır. Hər zaman Bayram müəllimin xeyirxah əməlləri el içində vurğulanıbdır. Digər tərəfdən Həsən Quliyev yazısında qeyd edir; Güya atamı və əmilərimi o oxutdurub. Bu isə tam yalandır. Ailə söhbətlərində həmişə qeyd edilirdi ki, Həsənə çörəyi rəhmətlik Əmir babam verib. Eyni zamanda Təhsilinə pulu rəhmətli Əmir babam təmin edib. Babam Əmirin verdiyi çörək haramın olsun. Tam qətiyyətlə bildirirəm ki, Həsən Quliyev bu cür böhtanlara görə məhkəmə qarşısında cavab verəcək. Qarşı tərəf haqqında əlavə nəsə demək mənə və ailəmizə yaraşmaz. Elin gözü tərəzidir. Bilən bilir kim kimdir. Atam Həsənov Əhəd hər zaman işində ləyaqətli olmuşdur. Hər zaman da atamın etdiyi xeyirxah əməllər bir övlad kimi bizim qarşımıza cıxmışdır. Bizi qururlandırmışdır. Ailədə üç övlad olmuşuq. Hər birimiz də davarnışlarımızda çalışmışıq nümünəvi olaq. Bir övlad olaraq sizin qəzetinizə yazmağı özümə borc bildim. Düşünürəm ki, cavab haqqım var və yazımı şəffaf şəkildə qəzetinizdə dərc edəcəksiniz. Eyni zamanda qəzetinizdə yoxlanılmamış yayımlanan məlumatı araşdırmağınızı və həqiqəti əks etdirməyinizi xahiş edirəm. Həsənov Məhəbbət Əhəd oğlu”.