Gənc ictimai fəal Qəhrəman Əliyev ölkədə məmur özbaşınalığından danışdı.

- Qəhrəman bəy, ölkədə məmurların özbaşınalığından, korrupsiya əməllərindən çox danışılır. Sizcə bunların davamlı olmsı nə ilə bağıdır?

– Dediyiniz hallarla bağlı biz hər gün sosial şəbəkələrdən, mətbuatdan müxtəlif məlumatlar alırıq. Bu məlumatlar içərisində rəsmi şəkildə təsdiqlənənlər olmasa da, bir çox hallarda elə şylər baş verir ki, onların təsdiq olunmaması mümkün omur. Buna görə də bu gün sosial şəbəkələrdə məlumatlar yayılan zaman insanlar inanırlar. Çünki, zaman-zaman məmur övladlarının nalayiq hərəkətlərinin şahidi olmuşuq. Yaxın keçmişdə bir məmurun nəvəsinin avtoqəza nəticəində başqa bir şəxsə faciə yaşatmasını da gördük. Daha sonra məlumat yayıldı ki, bu şəxsin avtomobil kolleksiyası var. Bunun sübut olunması çətin olsa da, avtoqəza törədən avtomobilin sadə olmadığı, hər kəsin ala bilmək imkanında olmadığı hamıya məlumdur. Vaxtilə Xalq Artisti Ağasəlim Abdullayevin ailəsinə faciə törətmiş şəxs də məmur övladıydı. 2017-ci ilin yanvar ayında vəzifədən getmiş Ziya Məmmədovun oğlunun da elədikləri “dillərdə dastandır”. Bunlar sadəcə hadisə və ya faciə olmaqla yekunlaşmır, həm də insanlarda vəzifə hərisliyi və bir-birinə qarşı aqressiya yaradır. Yəni sosial təsirlərindən çox danışmaq olar.

- Amma bu faktlar həmin şəxslərin vəzifə funksiyalarıyla bağlı deyil...

- Razı deyiləm. Çünki, həmin şəxslərin gəlirləri və xərclədikləri pulların mənbələri sual doğurur. Eyni zamanda Azərbaycanda kifayət qədər məmur saymaq olar ki, onlar öz hərəkətlərilə də cəmiyyətdə antipatiya yaratmışlar. Vaxtilə Tağı Əhmədovun jurnalistlərə qarşı qeyri-etik ifadələri bu gün də sosial şəbəkələrdə paylaşılır. Keçmiş nəqliyyat nazirinin isə nəqliyyatın idarə edilməsi üçün yaratdığı strukturda ancaq küçə qaydaları hökm sürürdü. İnsanlar döyülürdü və təhqir olunurdu. Sürücülərin sənədləri əlindən zorla alınırdı. İnsanlar bu strukturdan şıkayət etməyə yer tapmırdı. Bu misalları çoxaltmaq olar. Bundan nəticə çıxarmaq olar ki, bəzi məmurlar öz xarakterini, davranışını öz işinə də tətbiq edə bilir. Azərbaycanın bir neçə regionunda icra başçıları özlərini ağa kimi aparırlar.

-Qəhrəman bəy, Sizcə bunun qarşısını necə almaq olar?

– Bunun qarşısını almaq üçün məmurlar ciddi cəzalandırılmalıdırlar. Təbii ki, korrupsiya əleyhinə vciddi islahatlar getməlidir. bu kimi, islahatçı proseslər davam etməlidir ki, vəzifə səlahiyyətliləri oturduqları kreslonun əbədi və şəxsi mülk olmadığını dərk etsinlər. Xüsusilə, övladlarını başa salmalıdırlar ki, onların eyibləri daha eybəcər görünür və ictimai fikrə təsir edir. Sanki, məmur övladlarına xüsusi bir dərs - “intizam dərsi keçirilməsinə ehtiyac var.

Akif