Bu gün Əvəz Zeynallının işi ilə bağlı məhkəmə prosesinə hazırlıq iclası keçirilib. İclasda Səda TV'nin əməkdaşı Elnur Şükürovun və onun vəkilinin açıqlamaları olub.
Elnur Şükürov deyib ki, DTX-da saxlanılarkən Baş Prokurorluğun əməkdaşı Mehman Hümbətov (xüsusi xidmətlərinə görə vəzifəsini qaldırıblar), Baş prokurorun müavini Elçin Məmmədov və Şahin adlı şəxs onu dəfələrlə övladlarının oğurlanacağı və 4 qardaşının haqqında cinayət işi qaldırılacağı ilə təhdid ediblər, onu məcbur etməyə çalışıblar ki, Əvəz Zeynallıya qarşı yalan ifadə versin. Bütün təzyiq, təhdid, zorakılıq faktlarına rəğmən Elnur Şükürov Əvəz Zeynallıya qarşı yalan və saxta ifadə verməkdən imtina edib.
Bugünkü məhkəmə prosesində vəkillər təzyiq və təhdidin başında dayanan Mehman Hümbətovun dərhal vəzifəsindən azad edilməsi və haqqında cinayət işi başladılması ilə bağlı vəsatət qaldırıblar. Bir sözlə, Əvəz Zeynallının birinci məhkəmə prosesi onun və Elnur Şükürovun həbsinin saxta, sifarişli olmasından xəbər verib. Bir mənalı olaraq, ilk iclasdan ittihamlar darmadağın edilib.
Hakimiyyətin tula payına işləyən mətbuatı hər zamankı kimi məhkəməni obyektiv işıqlandırmayıb. Bugünkü məhkəmə prosesində iştirakına icazə verilən APA və digər sifarişli media ictimaiyyətdə yanlış rəy yaratdığı üçün növbəti məhkəmə proseslərində onların iştirakından imtina edilməsi üçün lazımi addımları atacağıq: Necə deyərlər, gedin oyunlarınızı başqa meydanlarda oynayın. Bu meydan namərdlərin meydanı deyil.
Bakıda olmadığım üçün ilk iclası lazımi səviyyədə işıqlandıra bilmədik. Növbəti məhkəmə proseslərinin obyektiv işıqlandırılması üçün əlimizdən gələni edəcəyik.
Bugünkü məhkəmə prosesində iştirak edən, bizi təmsil edən bütün dostlara, media və vətəndaş cəmiyyəti nümayəndələrinə öz dərin təşəkkürümüzü bildiririk.
Sorğu
Hansı bölmədə daha çox xəbər görmək istərdiniz?