İsrail və Fələstin Qəzzada nəhayət ki, uzunmüddətli sülh razılaşmasının əldə olunduğunu elan etdilər.


ANS TV-nin məlumatına görə, Qahirənin vasitəçiliyilə əldə olunmuş razılaşma hər iki tərəfin döyüş fəaliyyətini dayandırmasını, həmçinin Qəzza sektoru blokadasının qismən aradan qaldırılmasını nəzərdə tutur. Qəzza sakinləri bundan sonra özləri xaricdən humanitar yardımı və tikinti materiallarını ala biləcək. Həmçinin fələstinli balıqçıların dənizə çıxmasına qoyulmuş qadağa da aradan qaldırılıb.

Atəşkəsin elan olunması və blokadanın yüngülləşdirilməsi xəbəri Qəzza sakinlərini çox sevindirib. Minlərlə insanın ölümü bahasına əldə olunmuş tarixi sülh razılaşması axşam saatlarından etibarən Fələstin küçələrində bayram edilib. Atəşkəs qüvvəyə minənə qədər isə atışmalar davam edib. İsraildə, Qəzzadan buraxılan mərminin partlaması nəticəsində 1 nəfər ölüb, 2 nəfər yaralanıb. 50 gün davam edən əməliyyatlar ümumilikdə çoxu mülki şəxs olmaqla 2100 nəfərdən çox fələstinlinin və 68 israillinin ölümünə səbəb olub.